Жолдас туралы 35

Жолдасы көптің олжасы көп. Жолдасың жақсы болса, жолым ұзақ деме,
Жолдасың жаман болса, қолым ұзын деме.
Жолдасты жол айырады. Жолы болар жігітке
Жолдан жолдас қосылар.
Жолдан қосылған жолдас болмайды. Жолдасын жолда тастамас болар. Жолдасын тастаған жолда қалар. Атты жолдас болмайды арбалымен,
Жортақ жолдас болмайды жорғалымен.
Жорға мінген жолдасына қарамайды. Өз басыңды дауға берсең де,
Жолдасыңды жауға берме.
Өзіңнен жолдасың мықты болсын. Жігіт жолдасымен белгілі. Шын жолдас сөзге берік, ерге серік. Жігіттің жайын жолдасына қарап жоры. Жора-жолдас не керек,
Жауға бірге шаппаса?
Арғымақ мініп не керек,
Жабыдан озып, артпаса?
Жақсы жолдас ерттім дегенше,
Жарты жолдан өттім де.
Жолдасы көптің қолдасы көп. Жолдасы жаманды жау алады. Құрдас тапқан құл азбас,
Жолдас тапқан ұл азбас.
Құс қанатымен, ер жолдасымен. Ат жаманы жолда қалдырар,
Жолдас жаманы қолда қалдырар.
Жалған жолдас көзіңе мақтар,
Сырт айналып сойылын баптар.
Жаман жігіт жолдасын жауға алдырар,
Өзін ұятқа қалдырар.
Жаман жолдастан мықты таяқ артық. Бір сапар ат арытпас,
Жаман жолдасын жарытпас.
Жолдасың жаман болса,
Алыс жүріп түн қатпа;
Қатының жаман болса,
Кісі алдында тіл қатпа.
Жолдасын жамандаған жолдассыз қалады. Тең теңімен, тезек қабымен. Тезек терсең теңіңмен. Тең құрбыңнан кем болсаң,
Көрінгенге жем боласың.
Әр құстың лайықты жемі бар,
Әркімнің лайықты теңі бар.
Бір көрген - біліс,
Екі көрген - таныс.
Мыңның түсін танығанша,
Бірдің атын біл.
Жақсыны жолдасынан таны. Жақсымен жолдас болсаң, ісің бітер,
Жаманмен жолдас болсаң, басың кетер.