Базар туралы 25

Базарға бар да, бағыңды сына. Базар - ақшалыға базар,
Ақшасызға назар.
Базар - бай, алушы - кедей. Бардың базары жанында. Базары жақын байымас. Базардағы ас бағына қарай піседі. Базарға әркім барар,
Өзіне керегін алар.
Базарда бәрі бар,
Ақшаң болса, әрі бар.
Барымен базар,
Жоқты қайдан қазар.
Базарда мың кісі бар,
Әркім танығанына сәлем береді.
Молданы мазарда көр,
Делдалды базарда көр.
Жігіт көркі - сақал,
Базар көркі - бақал.
Ажарлы мал базарлы. Алтын базарында бағалы. Алдамасаң базар жоқ. Құдығына қарай қауғасы,
Базарына қарай саудасы.
Үйдегі есепті базардағы сауда бұзады. Арзан менен қымбаттың,
Базар берер нарқы бар.
Жақсы менен жаманның,
Адам берер парқы бар.
Малдың нарқын иесі емес, базар айтар. Бай кісі базарға барса, сұм хабар алар. Сау басын саудаға салды. Сақалын саудаға салды. Аңшы қақпанды қаққанын айтар,
Саудагер базарда тапқанын айтар.
Саудагер ажарын сатады,
Сұрамсақ назарын сатады.
Арзан болса,
Алушыдан ынсап кетеді.
Қымбат болса,
Сатушыдан ынсап кетеді.