Бақыт туралы 49

Бақыт кілті - еңбекте. Бақ қонатын адамның ,
Ұлы епті , қызы көрікті болады.
Бақ келерінде,
Ер ентелей басып асығады.
Бақ кетерінде,
Ер маң-маң басып масығады.
Бағың асқан шағыңда,
Құзғын салсаң, қаз алар.
Бағың тайған шағыңда,
Тұйғын салсаң, аз алар.
Басыңа бақ қонарда,
Елден асқан данасың.
Басыңнан бақ тайғанда,
Қалыбыңа барасың.
Бақыт - қолдың кірі. Бақыт балақтан басқа қонады. Бақ таздың басына,
Пұшықтың мұрнына қонады.
Бақ адасса, батпаққа қонады. Адам бақтың қонғанын білмейді
ұшқанын біледі.
Бақ келді деп таспа,
Жау келді деп саспа.
Батыр - ортақ, бақ - жалқы. Баталы құлға бақ қонар. Бағы бар бардан құр қалмайды. Ініңнің ақтығына қарама,
Маңдайындағы бағына қара.
Ісіңе қарама,
Маңдайыңдағы бағыңа қара.
Кейде істің ағы біледі,
Кейде істің бағы біледі.
Таудай талап бергенше,
Бармақтай бақ бер.
Бармақтай бақ
қара суды теріс ағызған ақылдан артық.
Бөз көйлектің де қуанышы үш күнге созылады. Ер жігіттің:
аты жақсы болса - бір бақыт,
жары жақсы болса - бір бақыт.
Қолыңда жарық болса,
Қараңғылық қашады;
Даналық көзіңді ашса,
Бақытсыздық қашады.
Ақыл қонбаған жігітке,
Бақыт та қонбайды.
Ел алғысына бөленген,
Ен бақытқа кенелер.
Бапкері жоқта қыран жетім,
Бақ төрі жоқта ұлан жетім.
Тату үйдің бақыты тасыр,
Араз үйдің ырысы қашар.
Керіскеннің кесірі келген бақты кетірер. Таңы атып, тауығы шақырған. Бассыз берген мал - мазақ,
Бақсыз берген тіл - мазақ.
Білім - бақтың жібермейтін қазығы,
Білімсіз бақ - әлдекімнің азығы.
Еңбек пен бақыт егіз. Қайратты ерге мал тұрар,
Өнерлі ерге бақ тұрар.
Алғаның жаман болса,
Қонағың кетеді.
Ұлың жаман болса,
Бақытың кетеді.
Бағы тайған адамды
түйе үстінен ит қабар.
Бақ пен дәулет көшпелі. Татулық - табылмайтын бақыт. Бақыттының түйесі түлкі алар. Бақыттың көзі соқыр:
не тазға, не ақылы азға қонады.
Бақ қонбас жігіттің іздегені дес болмас. Өзі қара болса да,
Бақ, дәулеті сай болса,
Жер жарады қаңқылы.
Шыбынның басына бақ қонса,
Самұрық келіп сәлем береді.
Арсыз болмаса, мал қайда,
Айлакер болмаса, бақ қайда?
Бір түп ағаш отырғызсаң,
Еңбегіңнің жанғаны.
Адал адам өсірсең,
Басыңа бақ қонғаны.
Басына тұрымтайдың бақыт қонса,
Самұрық қызмет етер панасында.
Бақ болмайды басқа бақ,
Есің барда елің тап.
Бақыты жоқ адамға,
Бадырайған көз береді.
Дауасы жоқ ауызға,
Сылдыраған сөз береді.
Бас - бақ,
Ауыз - дарбаза,
Сөз - самал.
Бақ кейде тауып қонады,
Кейде ауып қонады.
Тауып қонса, ескертеді,
Ауып қонса, есіртеді.
Тақ пен бақ егіз.